《多倫多機場 - 行李大叔的背影》


以前讀書年代,每次抵達YYZ多倫多國際機場,都會見到幾個大叔企係度幫你推行李。雖然最低消費只係15蚊加幣,但當年年輕力壯的我,一定會寧願將15蚊攞去食all you can eat ,都唔會益阿大叔。





時至今日,多左個老婆,多左個Mr. Maple Baby,去幾個月旅行就好似去多次移民咁,今次翻多倫多有成12個大大小小的行李。加埋係飛機+轉機的35小時的煎熬,我終於將第一次奉獻咗俾大叔。


大叔的厲害之處如下:


  • 一架大車,幫你搬曬所有行李,推到機場外的接送車上,搬埋上車。

  • 不幸被抽中做covid 測試,帶埋你去做,等埋你做完先一齊出閘

  • (同學會同學最愛)見到海關好似完全當佢地無到咁,同大爺一樣係綠色通道(姐係無嘢同海關申報的通道)直行直過。一啲都唔「艱難大」,好似去咗有秘密海關通道既柬埔寨咁。




35個小時飛機之旅的我們已經心力交瘁,最後咁多件行李,收你22蚊加幣。至少唔洗搞到腰骨痛,唔洗因為好辛苦咁抬果幾件行李同老婆鬧交。


記得俾小費啊!


Mr. Maple Couple