The Maple Couple 同學會潮文 #8 【一個YouTube Pop-up video 改變我一生】
多倫多一月入學同學仔【Via Lens Canada】著
今日係2021年11月26號，寫呢個故仔嘅時候我已經成功到埗咗加拿大啦！老土啲都要講句，如果唔係The Maple Couple 我諗我真係好難咁順利。
寫呢個故仔唔係為咗獎品，不過有時諗起呢一年成日問自己係咪真係要走，真係捨得走？直至到咗加拿大先發現機會如果唔好好把握，可能下一秒就會冇咗。希望呢個故仔都比到啲仲考慮緊走唔走好嘅人一啲意見同諗法。
係香港出世係香港長大，因為中學果陣日日睇NBA ，已經好想去北美讀書移民，好唔鐘意香港。直到親眼見到2014嘅金鐘，2019嘅夏慤道，又開始覺得唔想離開香港，始終都覺得香港係好有希望。2020年唯一嘅親人（單親家庭長大）因為肺炎離世，好記得當日望番香港望番曾經同屋企人最多回憶嘅屋企永遠都去唔番以前咁，就突然之間有一種一定要走嘅諗法。原本嘅計劃係2020年就要走，當時未有BNO未有HONG KONG PATHWAY，所以目的地係台灣。無奈真係太多事要處理，最終未能成行。
去到2021年嘅3月份，台灣開放報讀，我亦都有Apply幾間大學，當時已經做晒準備去台灣讀書開始新嘅生活。
好記得6月份某一日夜晚係YouTube睇緊移民嘅資料嘅時候，突然YouTube suggestion 彈咗一條片：【加拿大讀書： 如何快速登上加拿大香港人救生艇？ 你是這4類香港人嗎？要黎加拿大讀書報學校，如何贏在起跑綫？真係正過BNO 5+1?】
可能聽落好神奇但係如果唔係YouTube 彈咗呢條片出黎，【加拿大】3隻字都唔會係我腦海入面出現，更加唔洗講我呢一刻已經身在多倫多。
用咗一晚時間睇晒 The Maple Couple成個channel 嘅片，記得我當時問番自己記唔記得細個幻想過無數次嘅北美移民夢。
我諗咗一日之後，再不斷係Google 嘗試了解下加拿大呢個國家之後，當晚就contact 咗The Maple Couple。
講完比佢聽我個情況之後，因為當時已經就黎7月，要報2022年1月入學都開始有啲趕，所以The Maple Couple 即時就建議我搞掂咗Duolingo先。用咗幾日時間搞掂Duolingo，連書都冇溫過就去考埋個IELTS，好彩最後個成績都足夠報學校。
時間過得好快，唔洗一個月就收到Offer，開始準備各式各樣嘅文件，一路忙一路問自己，其實係咪真係準備好要走？
去到Study Permit批咗，買完機票之後越黎越緊張，開始擔心好多野，怕過到去適應唔到，怕天氣凍，怕第日搵唔到工⋯⋯
同學會入面有好多都係一家人去，而自己一個人去會唔會好孤獨？
一路去到真係走果日，臨走果一晚望住屋企隻貓同埋一隻13歲嘅狗仔，驚自己最後一次見到佢地（雖然出年就會接佢地過黎），到自己真係出發起飛，落機望住呢個好陌生嘅環境，到今日坐係啱啱上晝先到嘅書檯打呢篇文先發現，夠膽踏出呢一步先會知原來自己之前一路猶豫嘅野係幾咁渺小。
依加到咗埗開始拍下片，希望自己有能力可以幫到其他諗住走嘅香港人。
其實由以前到依加都係，只要肯互相幫助，香港人呢個身份永遠都會存在係到，就好似係同學會Group入面咁感受到原來仲有咁多香港人會咁熱心。
諗起呢一年有同過身邊好多好朋友傾計，講起移民10個有9個都係「過兩年就走」、「儲下錢」「唔捨得屋企人」。唔知係咪因為除咗呀哥，貓貓狗狗之外，除咗人之外冇野值得留戀。但係想同果啲仲諗緊驚搵唔番香港人工，每一日都仲「過一兩年就走」嘅朋友講，越猶豫機會就越細。希望我地有緣可以係加拿大再見面飲酒食飯！
Via Lens Canada YouTube Channel:
【你和我的故事 大比拼】
可參賽人士：經The Maple Couple 免費報讀2021年5月、9月及2022年1月入學（任何合作學院），並最終成功入學的同學。請立即上載你的加拿大讀書的準備、經歷和故事。中英皆可，字數不限。
我們會稍後經專人選出當中最佳故事，作全民投票，頭3名勝出者將可獲得豐富獎品, 包括頭獎13吋Mac Book Air、二獎 New iPad、三獎 Bose SoundLink Bluetooth 360 Speaker