top of page

好想去旅行系列 - 多明尼加共和國 Punta Cana 旅程詳細分享

上回講到,以前係香港住果陣,每年都會去泰國享受陽光與海灘。


黎到多倫多後,雖然夏天都可以去湖灘hea 下,但係就真心同泰國無得比。


一直都知道南部有堆加勒比海小島一樣都係陽光與海灘,但好少有香港人去,而且好多人成日都話有幾貴幾貴。今次係同行親友安排之下,幫我地安排第一次住源於法國的Club Med (可惜近年俾中資收購,不喜勿插。)佢神奇之處係一個價錢包機票、機場接送、酒店房間、設施、所有飲飲食食,仲有4個月以上BB就可以去佢地個day care (需自費)。


真心咩都唔洗預備,直接可以出發。對於各位大忙人或者大懶人來説,簡直係福音。


另一重點係,强國人未開發依個地方,全程耳根清净!Relaxing過去海洋公園好多~


出發事項


話咁快就係出發之日,講真,工作家庭生活繁忙的我們,係出發前咩都無準備過。靜係知道唔洗驗Covid Test 、加拿大人唔洗搞VISA、機票又係Club Med幫我地搞埋,只需要出發前24小時Check In就可以,好方便。去到機場好快就搞掂曬所有野直接登機,今次係坐Air Canada,帶埋Mr. Maple Baby 去,咩都唔洗排隊,好方便。




機程只係4個鐘頭,同香港去泰國差不多,真係好快過。


轉頭就到達位於加勒比海的Punta Cana。一落機望下個機場咁有style,就知道係旅遊區,絕對唔係咩第三世界國家。一出閘口就有幾個酒店員工接我地去Punta Cana Club Med酒店。而酒店都只係距離機場10分鐘車程,對於有小朋友的我們來説真心方便。同時,機場有大量Duty Free同埋Sovenior Shop,手信去到走過陣買都未遲。










 

有咩玩


而依間酒店真心好大,成個旅程根本上唔需要出去都打把野可以玩,玩到累就可以隨便坐低係佢幾個唔同酒吧度chill,全日紅白酒、鷄尾酒、mocktail、果汁、汽水、咖啡等任飲。對於我地依D勁勁勁鍾意飲野既人黎講簡直係天堂。而且佢D野飲有質素,絕對無偷工減料。


你睇下上面個地圖就知道間酒店幾大,連足球場都有,日日行超過10000步都無難度,行到累就可以去下按摩、剪頭髮、推拿 (但係無泰式啊!同埋係5星酒店質素,所以唔平)。而且酒店每日都會提供大量不同活動等你免費參加:

  1. 水上活動 (獨木舟、浮潛、海灘設施、風帆、成人游泳專區等)

  2. 運動 (Pickleball、足球、籃球、小型哥爾夫、網球、乒乓、沙排、瑜伽堂、group exercise)

  3. 派對 例如 beach party、pool side party

  4. 大量表演和團體活動,適合家庭或Couple















拖住阿仔,我地仲可以周圍去玩。有部分家長會將小朋友放係Kids Club 參加活動或Day Care,小朋友仲有自己的游泳池,正過斧山道游泳池!所以玩方面真係唔洗擔心,只要你肯玩,就有野比你玩。如果你鍾意宅,係酒吧、海灘、游泳池、餐廳hea,都好舒服。


大人小朋友萬一唔舒服,可以係酒店睇埋駐場醫生。Club Med 個package本身有埋醫療保,煩少一樣野,真係算係咁。




 

有咩食


食方面,咁就一定無Pad Thai同埋冬陰功架啦。雖然酒店一日包三餐 (可自選去餐廳叫 Three Course或食自助餐),但野食真係唔錯,以西餐爲主。同行人一般為歐洲和美加游客,所以無人搶野食,好和諧。


有咩好食?黎到加勒比海,不能錯過的兩個重點:


  1. 海鮮:魚、蝦、帶子、魷魚、八爪魚等都非常新鮮,無論係同salad生食 (好似Poke咁樣)、燒烤、煎炸等煮法都係係加拿大好難先食到!讚!

  2. 水果:熱帶地區水果質素出衆,Costco 、Farm Boy都買唔到!尤其係個芒果!終於食到有泰國、菲律賓質素既芒果啦!同埋D果汁好新鮮,唔洗加糖,好感動!

其他食物質素正常,最重要係同行5人 (有60歲以上人士)日日係咁食,食足5日都無肚痛,咁就已經pass啦!












 

講到尾,每人洗左幾多錢


去旅行洗幾多,人人生活質素、要求不同,所以無咩值得比較。但整左個簡單表比大家參考。其實價錢同我以前去旅行都係差不多。所以真係 no complain。


如果大家唔滿意的話,可以由加拿大飛返香港時先再去泰國都得啊。


但我自己就好滿意啦講真。去旅行最緊要開心。

如果大家鍾意睇我地旅程分享,可以俾個like!我地將來會為大家作更多相關分享。






bottom of page